εìíз الله يرحمك ياهديل

انتقلت الى رحمة الله تعالى المدونة : هديل محمد الحضيف..

صاحبة مدونة ( باب الجنة )

الله يرحمك ياهديل ويغفر لك ويسكنك فسيج جناته

كان الخبر مفجع جدا صباح اليوم الجمعه … كنت اتمنى ان سمع خبر شفائك ياهديل وتعودين من بيننا بابتسامتك الللتي عرفناكي بها ..

رحلتي ياهديل ولكن لن ترحلين عن قلوبنا ..

يارب اغفر لها وارحمها وثبتها ،،،

اللهم اجعل ما اصابها تكفير لذنوبها

الله اجعل قبرها روض من رياض الجنة

الله بدل سيائتها حسنات

اللهم انزل الصبر والسلوان على والديها واهلها يارب العالمين

لن ننساكي ياهديل ..

رحلتي عن اعيننا فقلوبنا لن تنساكي

سنظل ندعوا لك بظهر الغيب ، سنحمل لكي الحب كما كنتي تحملينه لنا ..

اللهم ارحمها برحمتك التى وسعت كل شئ ..

الله يرحمك ياهديل

الله يرحمك ياهديل

الله يرحمك ياهديل

سنفتقدك ياهديل …..

εìíз اسئلة تبحث عن جواب؟

كثير من الناس يسئلوني ..

وين ابوك مضيعه ؟؟

كيف يعني ابوك في الاسر ؟؟

وين اسرينه في غوانتانامو؟؟ >> بسم لله عليه

لية مخلين ابوك في السجن وهو مخلص تحقيق من زمان وش يسوي طيب ؟؟

لية اسجنوه على شان قدم خدمة انسانيه ؟؟

لية يسجنون بالسعودية ؟؟

لية ماتزورونة كل يوم ؟؟

كيف يعني صار هذا الشئ ومتى و……….الخ؟؟

لية ماسويتوا واسطة ويطلع ؟؟

لية

لية

لية

لية

اسئلة غريبة ..!!! او البشر مو عايشين بالديرة ؟؟

استغرب من اسئلتهم واتفاجاء بصراحة ….

واجلس اقول كم سجن بالسعودية ، وكم شخص داخل السجن ، والسجن داخله ناس اكثر من العدد المطلوب .. وين كل هالبشر ماتدري بالاخبار؟؟

الكل يفكر ان الشخص اللى بالسجن لازم يكون اما قاتل او مسوي جريمة محد يدري ان السجن فية ناس كثير مظلومة وفية بشر اهلهم مايدرون عن وجودهم وين ….!!

لما يسئلوني اصاب بالحزن الشديييييييييد واتمنى انى اصيح ،، او اقولهم يسكتون احسن ..

واحيانا ما اجد جواب وانا عندي جواب لكن كيف اوصل الجواب الى من يسئلني ؟؟؟ وهو اصلن مايدري وين ربي حاطة

طفشت وانا اقول سبب اعتقال ابوي

طفشت من الناس الى مو عايشة معاك في وسط المنزل وتحسب على كيفها كم يوم لابوي من اعتقال …

طفشت من الناس اللى تغير الكلام وتقول شئ ثاني وتنكر كلامك ..

طفشت من الناس اللى ماتفهم وش يعني اعتقال ….

طفشت من الناس اللى همهم تفاهات الدنيا ويجون ويتفلسفون

طفشت من الكلام اللى لا يودي ولا يجيب ولا حتى يفك اسر ابوي

اتوقع هالبشر لو تسئلونهم عن اخبار استار اكاديمي واخبار الفن والطرب وتفاهات الدنيا تجد الجواب لديهم

” عفوا : السكـــــــــوت من ذهــــــــــــــــــــــب  “

εìíз مأساتي ..!!!

الى اليوم وانا عايشة من غير انترنت ..

الحياة من غير انترنت ، حلوة والله ما اقولكم لا مش حلوة بس مهما كان ضروري النت ..

المشكلة عندي شغل كثير وانا موقفة كل شئ والسبب الانترنت ..

( صديقاتي بالكلية عندهم عرض وطالبين اسوي لهم العرض عن “الشوكولاته ” وتأخرة عليهم كثير )

بقولكم عن الخطوات اللى تم اجرائها على شان يرجع النت زي قبل ..

اول شئ تم الغاء (شامل ) والعودة الى البطاقات المدفوعه واكيد واكيد بنرجع الى (نسما )

لانه افضل اتصال الى حد الان …

قبل امس وبعد ما جبنا بطاقة الاتصال للاسف الشديد انه ما اشتغل النت ، يمين يسار لدرجة فكرة اني احذف المودم من فوق لين تحت يمكن يشتغل لية لا

بس للاسف الشديد ما اشتغل …

وبالاخير قالوا المشكلة من الاعدادت ،، سويت المستحيل على شان اضبط الاعدادات ولكن لا فائده

ومضيع يقولي جربت جربي يمكن يصير ..!!!

الغريب بالموضوع ، ان الريدر اشوف مضيع قارئ الريدر وراسل كم شغلة وش القصة من وين يشبك ؟؟

طلع ان طول الفترة ساكت ولا متحمس على النت لانه الاخ يشبك مادري من وين بالنت ….

اقوووول انا هالسكوت وراه شئ ,,

امس اخذت جهاز المودم وانطلقت الى محلات (الناجم ) هذا المحل من المحلات الرائعه جدا جدا واكثر من ثقة يعني حط جهازك عندهم ولا تخاف عليه وتأكد انه بيرجع لك سليم باذن الله …

وديت المودم والحمدلله اشتغل عندهم بالمحل >> يعني يامضيعه الان بتروحين البيت والمودم بيشتغل 100%

ماتتخيلون ابتسامتي العريضه طول الطريق واحس انى انجزت انجاز عظيييييييييييييييم ..

وصلت البيت وانا بقمة السعاده واركب المودم وللاسف الشديد نفس المشكلة لمبة المتصل ..

ماتشتغل ….؟؟؟

الحل …………؟؟؟

اتصل على المحل واقولهم المشكلة ، ويقول العامل اللى يشتغل الظاهر اسمة (انور) بس مو أكيد ، ان المشكلة من الكيبل التلفون في بيتنا ..

اتصل على مضيع وبما انه مو موجود بالبيت من الصبح وماراح يرجع الا بالليل ،،

قال اتصلي على 907 وارفعي بلاغ …!!

تم رفع البلاغ بنجاح ..

والى الان انا من غير انتر نت >> لاتخافون تراني مو شابكة من اسطوانه الغاز خخخخخخ

الصباح قلت خلني اسئل اختي يمكن خطيبها جايب المودم لها ؟؟؟

سئلتها فلانه ،،عندك المودم حق فلان او لا ؟؟

اهي : اخذيه موجود هنا ..

المشكلة الثانية : ان المودم مارضى يشبك على الاب توب حقي لحد يسئلني لية لدرجة انى فتحت الشباك وحطيت المودم قلت اكيد المشكلة بالارسال

واخر شئ واخر شئ

والان اشبك من جهاز مضيع المهم اني قدرت اشبك ..

بريدي الالكتروني راح ينفجر من الرسايل …!!!!

الريدر راح تطلع المواضيع برا الكمبيوتر من كثرها ….!!!!

مسجات بجوالي صديقاتي طالبين شغل واعتذر جدا جدا اني ماسويت شغل ولا وحده فيهم … >> سوري قيرل

(( هذي معناتي ومعانات الشعب السعودي …!!! ))

قدمت اختبار الـ SQL بشكل ممتاز جدا والحمدلله ..

وطبعا البرنامج لحد الان مانزل على جهازي والمحاولات الى الان جارية والظاهر المشكلة لان الSQL 2005 موجود لهذا السبب ماينزل 2000 وتم الحذف .. >> عندي مشكلة ان البرامج ماتنحذف من الجهاز لحد يسئل لية لاني مادري لية ؟

———

مواقف سخيفة :-

*في محل الناجم من سنة الظاهر اختي مودية اللاب توب حقها واهي تقول حق صاحب المحل عن المشكلة ، والفشلة اللى صارت ان البرنامج اشتغل واختي متاكده مليون بالمية انه ماكان يشتغل عندها بالبيت واخذت جهازها وارجعت ..

* وديت الاب توب حق للناجم الاسبوع هذا واقولة عن نفس الشئ مشكلة باحد البرامج واللى صار ان البرنامج قدام عيني ضبط وانا مسوية نفس الخطوات بس مادري كيف ضبط >> قمة الفشلة ..

* امس وانا واقفة انتظر يخلص لي المودم الا جات بنت المحل الناجم وتقولة ان عندها مشكلة في الماسنجر والاوفس وان مايشتغل ويطلع لها مسج ومادري وش .. والفشلة ان اشتغل وصاحب المحل وجهة مافي تعابير الظاهر متعود على نماذج زي كذا …

ابي افهم لية يشتغل البرنامج وتنحل المشكلة لما الجهاز الكمبيوتر يشوف وجه صاحب المحل ….؟؟؟

******

في اجازة لسكان المنطقة الشرقية او لا ….؟؟؟

قيل باذن الاجازة فقط 4 ايام ؟؟

وقيل بان الاجازة فقط يومين ؟؟

وقيل ان مافي اجازة اساسا …!!!!

عاشت عاشت بيلادي :P

عزيزي العميل :

انتظاركم محل اهتمامنا ،، صاحبة المدونة خارج التغطية …!!

رضائنا هو هدفكم >>

εìíз والله عيب ..!!

من يوم الاربعاء وانا معركة مع الاتصالات السعودية ..

واحس ودي اقتلهم بس ماسكة اعصابي .. لاني سمعت يقولون ( الصبر مفتاح الفرج )

وخلاص لازم نتعلم الصبر مافي شئ اقوى من رحيل ابوي واحنا متصبرين وساكتين ،، جات على الدي اس ال ..

اللى صار ياجماعه ..

ان كل مرة اتصل والى اليوم واهم اقتراحاتهم الفاشلة ..

طبعا احط الساعه قدامي واحسب 10 دقايق بالضبط ويردون عليك وغير احيانا يسكرون الخط بعد انتظارك لانك جلست تنتظر فوق الحد المطلوب …

بس الوقت المناسب للاتصال اول مايخلصون الصلاة امسك الخط ورن ورن  ورن ورن ورن وباذن الله يكون الانتظار اقل من 10 دقايق بس مو اكيد ..

طبعا لطريقة الاتصال  :-

1- 907

2- رقم (1) للغة العربية

3- اضغط الرقم (3)

4- اضغط الرقم (2)

5- اضغط مرة اخرى رقم (2)

طبعا ورى بعض دخل الارقام واجلس انتظر 10 دقايق …

من الخدمة الفاشلة جدا جدا :-

واحد يقول مانعرف حق مودم ( الريبوتيكس ) ..

والثاني يقول ( جيبي عود او شئ نحيف و دخليه بالمودم من ورى وعيدي اعدادات الجهاز وراح يضبط معاك ) >> هذي الحركة انا اكرهة لان مرة سويتها لما كان مضيع مسافر وكنت متوهقة مرة ولما سويتها طارت الاعدادت من جهاز بابا وما يوصل النت عنده ويا الله كل شوي يقولي الحين زي ماخربتي ترجعين النت في جهازي …

الثالث ( ان شاء الله ربع ساعه والنت خلاص راجع عندك نشكر لك اتصالك )

الرابع ( اي الخلل موجود بالدمام يومين وبيرجع )

الخامس ( 24 ساعه والدي اس ال بيكون ماشي معاك تمام )

السادس ( والله الاعدادات مو باينه معاي )

السابع ( افتحي اعدادت المودم وانا اقولك وين المشكلة ) >> وفجاءة طوووط طوووووووط انقطع الخط قلت ادب بما تعنيه الكلمة ..

والثامن مادري العاشر مادري المليون يقول ( اخذ اسم المستخدم وكلمة المرور الخاصة فيك وروح جرب في مكان ثاني غير بيتكم وشوف يشبك او لا ) >> هذا حل بالله عليكم

وغير وغير وغير من الحلول اللى ماتودي ولا تجيب ولا توكل عيش ( ترجمة : العيش يعني رز ) >> بس مادري وش الاحسن رز المهيدب او بوكاس :d

بعد هذا كــــــــــــــــــــــله ..

لما تكلم مرة ثانية او بعد يوم يقولك ( مين قالك تعيدين الاعدادت من ورى ، والثاني يقول مين قال ان ربع ساعه ويرجع )

شلون يعني كل واحد يعطي حلول على كيفة بس يصرفون المتصلين …!!!

والله عيب

** مو من حقنا نطالب بشركة اتصالات جديده تخدم الناس غير الاتصالات السعودية ..

اذا شركة الاتصالات مشاكلها كثيرة يفتحون شركة ثانية يخفف الضغط على شركة الاتصالات ونتطور شوي ..

لية مايفتحون شركة اسمها ( الانترنت السعودي ) ومافيه كلمة الاتصالات وغير عن خدمة الاتصالات وتكون شركه لحالها ..

وتخدم العالم والناس ..

عزيزي العميل :-

زيارتكم لمدونتي محل اهتمامي

وتعليقك وتواجدك من اهميت مدونتنا

ان كتابتنا للبوستات لتطلع للمستقبل المشرق

ان كان التعليق مشغول يرجاء المحاولة في وقت اخر

وان كنت تواجه صعوبة في التصفح المدونة يرجاء الانتظار لنتمكن من خدمتكم

وان كنت قد اشتقت لبوستات هذي المدونة يرجاء الانتظار حتى يتم حل مشكلة النت في منزل المضيعين

عزيزي العميل : نعتذر عن عدم الرد على الايميلات وعلى التعليقات في المدونة

صاحبة المدونة مشغولة .. انتظاركم محل اهتمامنا ..

εìíз الى الاتصالات السعودية

وضع مايعلمش فيه الا ربنا …!!

3 ايام من غير انترنت

ايييييييييييش المشكلة يا شركة الاتصالات السعودية حراااااااااااااااام عليكم

والله لو نشبك من اسطوانات الغاز اتوقع ارحم لنا ..

3 ايام وانا كل يوم اقول اليوم بيرجع النت ..

وضع اسوء من كذا ما اتوقع ..

من امس لين اليوم وانا ناشبة حق 907 والله العظيم اكسر الخاطر .

جاني صداع يوم الخميس والسبب ( عزيزي العميل ، انتظاركم محل اهتمامنا ،، جميع الموظفون مشغولون الان في خدمة عملاء اخرين فضلا انتظر لنتمكن من خدمتكم ) >> حسيت انهم يقصرون العمر ،، وجاني النوم وانا ماسكة سماعه التلفون واتصل ….

وقال ايش المشكلة في الدمام كلها ..

والثاني يقول : كم ساعه ويرجع النت ..

وكل شوي تصريفة شكل وحسيت اني بزرة واهم يصرفوني ..

وبالاخير اتوقع من كثر ماطفشنا ولد عمي موظف في الاتصالات واحنا نستفسر منه الله يجزاه الف خير يارب ويصبرة علينا

تبرع لنا وعطانا المودم حقه واتوقع يقول بقلبة ( فكوووووووني )

^

^

(صورة المودم )

الله يجزاك الف خير يا (ولد عمي ) وخطيب اختي … ويوفقك دنيا واخرة ويسعدك في الدارين …

ويحقق لك كل ماتتمنى ..

مسكين كل مرة ترا اهو الى ينقذنا في مشكلة الدي اس ال بس والله طفشناه ..

* مشكووووووور ونخدمك يارب في زواجك عاجل غير اجل ..

————

عندي مشكلة في الويندز الفيستا ان برنامج sql ماينزل عليه وحاولت انزل اصدار 2000 ورفض ينزل ولازم اصدار قديم ..

اللى صار اني وديته لاحد محلات الكمبيوتر بالدمام قال محد ينزل لك البرنامج الا بالخبر ..

طبعا الحمدلله عندي اخ رائع اسمه ” مضيع ” ماقصر الله يزوجة عاجل غير اجل ويرزقة زوجة تتحملة واهو يقول ( اووووف )

والحمدلله نزل لي برنامج sql بس السؤال ياجماعه

وين البرنامج بالجهاز ،، لو اكسر الجهاز قدامكم البرنامج مووووووووووووووووو موجود

مضيع يقول البرنامج موجود وانا متاكده ان اللى منزل sql هذا قديم انا شايفته من اول ما شريت الاب توب ..

ومضيع يقول دوريه بتحصلينه وربي اني دورته وانا ادرس الماده وعارفة شكل البرنامج مو موووووووووجود ( البحث في الكمبيوتر وانا ادور الجهاز يقولي مااااااااااااافي )

اخاف تطلع لي يد من الشاشة تصفقني من كثر ما اسوي بحث …

- ماهـــــــــــــو الحل ؟؟؟

لحد يقولي وديه مرة ثانية الخبر لان مضيع يقول مايبي يوديه ( يقول فاضيلك كل شوي اودي الجهاز واجيبة لك ماعندي شغلة الا جهازك ) >> الحين فوق راسي مضيع يقول بكرة الصباح بيوديه بس تذكروا ان كلام الليل يمحوة النهار

** المصيبة اني ما اعرف المحل اللى بيودية مضيع الكمبيوتر وخفت تنسرق بطاريتي >> كان مافي حل قدامي الا

الا …!!

الطخ البطارية بالمناكير الفوشي حرصا على بطاريتي الاصلية …

(( دعواتكم بان يعود الانترنت الى منزلنا كما كان سابقا ))

الحيـــــــــــــــــــــــــاة من غير انترنت ســـــــــــلطة ….!!!!

او تدرون خلوها تبولة >> بعدين اقولكم قصة التبولة ..

الان نترك الانترنت لمضيع >> ياليل ماطولك

εìíз دعاية “بربيكان “

كنت في حديقة بيتنا ” وكما يطلق عليه اسم حوش ” واشوف مودي ولد اخوي يلعب العصر مع الارانب …

جبت لي بربيكان “بالفراولة “

وما كنت افكر ولا مرة بحياتي اني اسوي مشروع دعاية لاني اخاف ان المنتج يخسر والسبب دعايتي ..ولكن من الطفش تطلع الابداعات >> سبع صنايع والبخت ضايع

كانوا الارنبين يأكلون من العشب الاخضر

وفجـــــــــــأهـ جاء بربيكان

طبعا الارانب مادري كيف اسمعوا صوت البربيكان مادري شموا الريحة ..!!

وبدا يتحسس ..

جاو يركضون من بعيد

ووصلوا الارنبان وهم في قمت العجلة >> الحمدلله انهم ارانب جاو بسرعه لو سلاحف كان بموت ولحد الان ماوصلوا ..

طبعا الارنب اللى فية شوية بني ( هذا ذكر ) والابيض بالكامل ( انثى )

طبعا كانوا يتساسرون مادري وش يقولون >> ” لايتناجى اثنان دون ثالث “

صاروا يقربون اكثر واكثر، ولكن بحذر شديد يمكن يكون فخ …!!!

اقترب الرجل قبل الانثى حرصا على سلامتها وخوفا من وقوعها بالفخ وهو الرجل واكثر شجاعه ” لازم الحريم يسمعون كلام الرجال “

بعد التأكد بانه مجرد بربيكان لذيذ

سمح للارنوبة البيضاء ان تقترب ..

وبالاخير : تم سرقة البربيكان بنجاااااااح

The end

εìíз كتاب تعلم ipod+itunes

كثير من الناس تشتري الايبود وعندها مشكلة ماتعرف تحمل فيه ولاتعرف كيف تفتحة اصلن …!!!

وكثير ناس توجهم بعض الشغلات والاستفسارات ويجلسون يدورون على احد يعلمهم..!!!

وكثيييييييييييييييييييييير ناس كثييييييييييييير مررررة يروحون محلات الكمبيوتر كل مرة على شان يحملون شغلة ..!!

الان انتهت المشكلة …

مع كتاب : تعلمipod &iTunes

للكاتب وصاحب مدونة : محمد أحمد الملياني ..

الكتاب فيه شغلات كثيييييرة وشامل بكل ماتحتاجة للايبود ..

سمعت عن الكتاب في مدونة الملياني ، وشفت كم مدون كاتب …

بس ماتوقعت ان الشرح واضح ورائع زي مامسكت الكتاب بيدي وبديت اتصفح الصفحات ..

الشرح بالترتيب والنقاط مذكورة مع الصور لكل خطوة ..

- ماراح اكتب اكثر عن الكتاب اخاف انى ما اعطية حقة واخاف اني اقلل من قيمته …

بس حبيت اقول لكل من يبحث عن كتاب يعلمة على الايبود ياخذ كتاب الملياني بدون مايتردد

نتمنى التوفيق لمحمد الملياني ،، ونشوف له الملاييين من الكتب اللى تفيد الناس وتخدمهم في حياتهم ..

وان شاء الله في ميزان حسناتك يا محمد ..

موجود الكتاب بخصوص سكان الشرقية :-

عند اي مشين بمجمع الراشد ..

GO Milyani

εìíз وش يرضي الناس؟

الناس مايرضيها شئ ..

وكل همهم الناس اللى حولها ولا يهتمون بنفسهم ..

وكل يراقبون الناس وينسون يراقبون نفسهم ..

ومافي شئ يشغلهم عنك ابدااااااااااا ..

ويهتمون لاخبارك اهتمام عجيب وتقول الحين بيجيون يساعدونك …!!!

*ان طلعت واستانست

قالوا :- طلع ومستانس وفرحان

* وان جلست بالبيت

قالوا :- مايروح ولا يجي حاط هموم الدنيا على راسة

* وان ضحكت ..

قالوا :- لا مافية شئ جالس يضحك

* وان صحكت ..

قالوا :- مكبرين السالفة ويصيح

* وان جلست تسولف ..

قالوا :- والله طاقها سوالف ولا همه شئ عادي ..

* وان جلست ساكت بدون ماتتكلم ..

قالوا:- ساكت ولايتكلم يزهق الواحد .

* وان شافوك لابس وكاشخ

قالوا :- كل بالاسواق يدور ويشتري ..

* وان صرت مبهذل

قالوا :- مايهتم بنفسة وحالته حالة ومايعرف يترتب ..

وان قتلهم عن شئ تعرفة وصرت زي مايبغون على شان ترضي البشر

اسكتوا ومامدحوك لانهم يدورون عليك الشئ الشين ويدورن عليك زلة ..

واخر شئ يصكوك بعين وسدحوك في اقرب مستشفى

εìíз احرمونا من صوتك !!

132يوم على رحيلة ..

الـ 100 لحالها تقطع لي قلبي وتحرقة لما اتذكر الايام ،، وفوق المية 32

اليوم موعد الاتصال ..

وانا مشتاقة لهذا اليوم ..

اليوم عندي اختبارين لمادتين ،، ولكن غبت على شان موعد الاتصال

كان المفروض يكون امس الاحد .. ولما صحيت الساعه 8 قبل لا اروح ، دخلت غرفة مضيع وصحيته من النوم واسئلة اليوم او بكرة الاتصال ..؟؟ ولما قالي بكرة الاتصال رحت للدوام وغبت اليوم ..

اتصلت على المراقبة وكالعاده تسئل عن سبب غيابي …

الكوارتر اللى راح لما قتلها عن سبب الغياب ، جاتها صدمة لاني كنت اقولها بالبداية ان ابوي مريض وبالاخير قتلها السبب الحقيقي .. قدرة الوضع بس محد يحس بكثر شوقك حق ابوك وانك ماتسمع صوته الا بالاسبوعين مرة وعشر دقايق المكالمة مو اكثر ..

قالت لي : مضيعه لازم يعني تكلمينه بيزعل ابوك لو ماكلمتيه ….؟؟

ماكان ودي ارد عليها ،، بس قلت بقلبي عادي الناس ماتحس بالشعور اللى انت عايشة ومافي داعي تقول للناس عن شعورك لان لو الناس تحس بشعورك كان الدنيا بخير من زمان …

صحيت اليوم من الساعه 8 الصباح وانا طول الليل مانمت كل شوي اشوف الساعه كم باقي على الصباح والنور يطلع ,, انتظر وقت الاتصال واسمع صوته ..

الساعه 9 بالضبط انا اتسلل بهدوووء لغرفة مضيع على شان اسرق جوالة ،،، وانا امد يدي على الجوال الا مضيع يفتح عينه وشافني اخذ جوالة وطلعت من الغرفة بهدوء وصمت …

من الساعه 9 لين الان الساعه تشير الى الواحدة ظهرا ..

وانا اطالع شاشة جوال مضيع انتظر الاتصال ،،

انتظر صوت نغمة جوال مضيع اللى صرت اكرهة ..

انتظر الرقم اللى بيطلع بالشاشة وانا اشوفة من اربع شهور ..

انتظر متى امد يدي واضغط على الزر الاخضر واسمع صوته ..

يعني انحرمنا من شوفتك يا بابا وبعد يحرمونا اليوم من صوتك ..

الوقت يمر قدامي وودي اصراخ واقول للدقايق انتظري وقفي لاتمشين اخاف من الساعه 12 الظهر ويكون ما اتصل ..

وقت الاتصال فقط من 9 صباحا لين 12 ظهرا

وبعد اذان الظهر مستحيل راح يتصل .…

الساعه : 11:56 ص

11:59

12:15

12:18

12:25 حطيت الجوال على الطاولة بعد ماكان قدام عيني انتظرة بس يرن ..

تمام الساعه 10 وكم دقيقة ،، رن جوال مضيع وانا توني برفع سماعه الجوال انصدمة انه الرقم جوال بدون اسم المفروض يكون رقم ثابت .. يعني مو ابوي ..

ركض لغرفة مضيع وافتح الباب ومد له الجوال واقول يارب يارب يكون ابوي ..

للاسف مو ابوي ..

طلع مضيع من البيت وخل جوالة على شان يتصل ابوي ..

واجلس لدقائق انتظر وانتظر

الا بجوال مضيع يدق وامد يدي الا مسج …!!!!

انتهى اليوم

وانتهى الانتظار معاهـ

ما سمعت صوتك يا بابا ..

احرموني من صوتك يا بابا احرموني من اني اطمن على صحتك ..

احرموك العشر دقايق تطمن قلبك وتعرف اخبار اعيالك

متأكده انك حزين اكثر من حزني لانك لم تستطيع الاتصال ..

صبـــاح الخير يا اغلى بابا بالدنيا ..

اتمنى انك بخير يا بابا ؟؟

εìíз كتاب/ فئة الدم B

كتاب : فئة الدم B النظام الغذائي المناسب

-تخلص من الوزن الزائد

-تمتع بصحة أفضل

- عش حياة أطول

(فئة الدم اهم بكثير مما تعتقدون !)

————

اشتريت هذا الكتاب من المكتبة من شهرين تقريبا …

بعد ماسويت تحليل دم وعرفة فصيلة دمي انها (بي ) ،، اشتريت هذا الكتاب بديت اقرا فية وانا متحمسة على الاخر وقلت الحين بعرف شخصيتي >> اي هين ..!!

تذكرون كتاب الغذاء يصنع المعجزات،،هذاك يتكلم عن البشر بشكل عام ،، بس هذا حلو لان وانت تقرا تعرف انه راح يفيدك وراح تستفيد منه ..

الكتاب “النتفة ” الصغيروون هذا فية (17 فصل ) البداية عجبني الناس اللى تكلموا عن فائدة الكتاب وكيف استفادوا منه وصحتهم صارت تمام ..

** انا من زمااااااااااان كنت قارية مادري وين ان تقدر تسوي رجيم مجرد ماتعرف فصيلة دمك ، وقلت حق وحده من قرايبنا وقالت لا مايصير واهي كانت تبي تسوي رجيم ،، انا سكت وكنت افكر اني غلطانه بالمعلومة .. بس الحين تأكدة ان المعلومة صحيحة .. في وحده من صديقاتي تقولي ان وحده من قريباتها سوت رجيم بس وقفت اكل البرتقال والليمون والخيار ورجع وزنها طبيعي ، وكيف عرف الدكتور اكيد من فصيلة الدم .. كيف فصيلة الدم مالها دخل بالرجيم والصحة وغيرة ..

الحمدلله انا ما احتاج اسوي رجيم ولا بحياتي فكرة اني اسوي احس الرجيم موت بطيئ الله لايحوج احد حق الرجيم قولوا امين …

طيب  نكمل

الكتاب صحيح صغير بس ما اقدر اكتب لكم كل شئ راح اختصر وبقول لكم الزبده >> على طاري الزبده ترا الزبده من الاشياء الغير ضارة لفصيلة دم “بي” وانا اعشق الزبده

- كل فصل وفية نوع من الاكل مثلا ( فصل لحوم ، فصل الاسماك ، فصل الحليب …………….الخ )

كل فصل يكتب لك كل انواع الاكل واسماء كل نوع ويقولك

المفيد جدا : وهو اللى لما تاكلة ينفع الجسم مررررررة ويستفيد منه ..

غير ضار : وهو اللى تاكلة بس ماياثر بجسمك يعني ماينفعه ولا يضرة

تجنبوا : وهو الاكل اللى تاكلة ويتحول سموم في الجسم …

** ضاق صدري لان الكاتشب من الاشياء اللى تتحول سموم في جسمي وانا اعشق الكاتشب ..

- الغريب ان كاتب ان الكوكا كولا لازم اتجنبة وصحيح انا لما اشرب الكولا اتعب ، بس البيبسى عادي .. وتركت الغازيات كلها اصلن من زمان .. وغريبة ان كتب … ( وش المادة اللى موجودة بالكولا ومو موجودة بالبيبسى مو كلهم اخوان ) ….

* في جدول بكل فصل يكتب لك كم الكمية اليوميا اللى لازم تاكلة من الخضار او الفواكة او الاسماك ..

تقريبا هذا كل المهم بالكتاب ،، حتى لو ماتطبق الكلام الموجود بس حلو تعرف عن فصيلة دمك وايش الشغلات اللى تاكلها وايش اللى تبتعد عنها ..

يعني مثلا مانقدر نبتعد عن نوع معين من الاكل بس نقدر نقلل منه …

سلامتك سلامتك نودلك سلامتك ،، لانك الانسان تعمر الاوطان نودلك سلامتك نودلك سلامتك ما اسعد ههههــ>>> غبااااااار

سعر الكتاب : 10 ريال سعودي >> بس انا مشترية بـ 5 ريالات :\ لحد يسئلني كيف …!!

اتمنى قراءة ممتع ومفيده للجميع …

اللى فصيلة دمة B بعطية الكتاب مافي اي مشكلة ..

قرائتكم محل اهتمامنا..