εìíз ان الهاتف المطلوب لا يمكن الاتصال به الان

 

سئلة المدونة فيميل سؤال في احد تعليقاتها بالمدونة على بوست ( ودعنا الفردي ونرحب بالزوجي ) , سئلة سؤال كما يسئل الجميع ، اصلن في اسئلة كثيرة اشوفها وماعندي جواب.. اعتذر للجميع عن عدم الرد!!!

بس سؤال فيميل ابي اجاوب عليه…

قالت : ( طيب مضيعه ما تعرفون رقم تتواصلون منه ..أو أي شيء ..؟؟) >> هذا فقط كان سؤالها ..

حبيبتي فيميل ” احبك في الله “ ماتدرين ان اول اسم بجوالي اسمة !!!

اخاف اصاب بالجنون ،، لانى كل يوم او كل يومين ادق على الرقم اقول يمكن ينفتح الجوال >> ادري اني مجنونة ..

بس لحد يلومني!!! اول الايام كنت اخاف ادق ، وقلت حق مضيع ودي ادق .. قالى اتصلي عادي .. ومن بعدها وانا كل يوم اتصل ” مازال املي برب العالمين ”

* يوم الخميس اللى راح لما جاء اخوي “ضايع” كان ضايع يقول : والله العظيم كل شوي اشيك على جوالي احس انه بيتصل على وانتظر !! ” طالعت ضايع اخوي وانا بقمة الحزن والدموع بتنزل ” قتله والله كل يوم اتصل اقول يمكن ينفتح الجوال !!

ضحك ضايع مايبي يزيد همي قال وانا بعد اتصل ،، سئلت ضايع ( تتوقع عنده خدمة موجود ؟؟ ) قال مادري والله ؟ وجرب ضايع على شان يعرف اذا خدمة موجود او الجوال مغلق نهائي ، وطلع ان الجوال مغلق مافي خدمة موجود …

بحياتي كل عمري من يوم ما عرفته مستحيل مستحيل مستحيل مستحيل

تتصل على جواله ويقولك ( ان الهاتف المطلوب لا يمكن الاتصال به الان ) .. ودائما يقول حق اقاربي ، اي شئ يصير بالليل او تحتاج شئ دق على جوالي دائما مفتوح مستحيل اسكره.. وعندما تنتهي بطارية الجوال يتصل من اي تلفون ويقول لاتخافون بس بطارية الجوال خلصت ..

كل ماتصل يقولي (ان الهاتف المطلوب لا يمكن الاتصال به الان ..)

” الله يذكرة بالخير ويرجعه بالسلامة ” كان يقول : ( لية ماتصلتي على الله يهديك كان سويت الشغله الفلانيه لك تدرين جوالي كل معاي المرة الجايه اتصلي ) ،، ولما اتصل واحصل “انتظار” اغلق الخط يرجع يتصل على طول واول ما ارد يقول ( فيك شئ ؟؟ ) اقولة لا ” واقولة لية انا متصلة ” ..

والحين وينه ؟؟ انا كل اتصل بس مايرد

متى بيرفع الجوال ويرد زي قبل

——————

** قبل امس كنت نايمة في بيت اختي ، ورجعت البيت يوم الثلاثاء الساعه 4:30 العصر ,, وكان كل البيت نايم ..

دخلت غرفتي وجلسة افتح شنطتي وارتب اغراضي ،، شوية وانا بالغرفة الا اسمع صوته @@

افكر ان يتخيلي او انى صرت مجنونة ..

شوية الا الصوت يقترب اكثر واكثر ،، والله العظيم حسيت ان بيغمى على من الخوف .. ومشيت خطوات بطيئة للصالة الا اشوف ثوب وشماغ ” اطالع مين هالشخص اللى ركب فوق ” الا يطلع اخوي ضايع مار علينا وقفت اطالعه بعيوني واقولة سمعة صوتك زي صوته افكر انه رجع ,, ماكملت كلامي الا “مضيع ” طالع من غرفته ويطالع ووجه احمر ،، قلت للمضيع تفكر انه رجع لانك سمعت صوت ضايع ،، قال اي والله فكرة انه اهو ..

** واليوم الساعه 4:37 العصر,, انفتح كراج البيت وركضة لين شباك الصالة احسب انه جاء ،، نسيت ان سيارته واقفة عند باب الشارع ..

استغفر الله العظيم صرت اكرهـ الساعه 4:30 العصر لما يدق الجرس بهالوقت يسبب لى رعب

(( الله لا يحرمكم من اي شخص غالي ،، والله يرجع كل غالي الى اهله ))

****************

(( يا حي ياقيوم برحمتك أستغيث أصلح لى شأني كله ولا تكلني الى نفسي طرفة عين ،، اللهم انى أشكو ضعف قوتي وقلة حليتي وهواني على الناس .. أنت رب المستضعفين وأنت ربي ,,الى من تكلني ؟ الى بعيد يتجهني ؟ او الى عدو ملكته أمري ؟ ان لم يكن بك غضب على فلا أبالي، ولكن عافيتك هي أوسع لي أعوذ بنور وجهك الذي اشرقت له الظلمات ، وصلح عليه الامر الدنيا والاخرة ان يحل على غضبك أو ينزل بي سخطك ، لك العتبي حتى ترضى ولا حول ولا قوة الا بك ))