εìíз اعادة لي الذكريات

اليوم قبل اذان العشاء بدقايق بسيطة جدا ، جات الى بيتنا زوجة عمي وبنتها ،، وبعد فترة جاو عمات ابوي 3 وبنت عمته ..

دائما الله يجزاهم خير يمرون علينا وجلستهم حلوة ماشاء الله تبارك الله ماتنمل ..

سبحان الله على انهم كثيرين بس زيارتهم خفيفة على القلب جدا جدا وجلستهم ماتنمل ابدا ، وبعض الاحيان تيجي وحده بس تسد النفس وتجلس على القلب وتحس كتمة ودك تصرخ منها ..

المهم ما مر كثير من الوقت الا جرس الباب ( طبعا انا السنترال المتقاعد مبكرا جدا ) ،، رفعة سماعة الجرس واقول مين .. الا تقولي ام فلان ..

جات ممممم >> بقولكم صلة القرابة

خال ابوي هذي زوجته وتصير حق ابوي بنفس الوقت بنت عمته ،، فتحت لهم الباب دخلوا داخل البيت

وبدات امي بالترحيب فيها ، بس

كان معاها أم محمد ( زوجة عمي سعد الله يرحمه )

اخنقتني العبرة لما شفتها  ..

عمي سعد اللى ماجلست معاه كثير ويمكن المرات اللى شفتها فية بحياتي قليلة جدا جدا ،، وكانت مجرد ثواني اسلم عليه واطلع من المجلس لا اكثر ..

بـــس ….!!

عمي سعد اغلى انسان الى قلب بابا ،، لما يطري اسمة تسبقة دمعته ،، طول عمرة وكل حياته والى الان لما يتذكرة يقول ( الله يرحمك يا عمي سعد وينك بس ) كان يقول محد حاس فيني الا هو ، محد يفهمني الا هو ،، محد يصبرني الا هو ، محد ………………..الخ  كان دائما دائما يردد اسمة ، كان له مكان كبيرة في حياته

لما خطب ضايع اخوي ، سبب تاخير كتب الكتاب هو مرض عمي سعد كان ابوي مصر ان يكون موجود في الملكة لكن مرضة ماقدر يجي ولكن جاو اعياله الاثنين .. 

بحياتي ماشفت دمعة ابوي الا على شخصين ( أم سعد ) اللى تصير خالته  ” الله يرحمها ويغفر لها يارب العالمين ، كانت انسانه طيبة والكل يذكرها بالخير “..

وعلى ولدها (سعد ) اللى هو عم ابوي وولد خالته بنفس الوقت ” الله يرحمه “.

ذولي الانسانين اللى لين اليوم مايقدر ينساهم ، وكل يقول ان فقدهم واحيانا كان يقول اشتاق لهم .

عمي سعد لما كان مريض ويعاني من المرض لمدة سنتين او اكثر ، كان ابوي يصيح ويقول ودي اعطية قلبي  اتعب لما اشوفة يتالم وماني قادر اسوي له شئ ،، لما يرجع من بيت عمي يجلس يوم كامل واهو حزين لان يشوف عمه تعبان واهو اغلى الناس لة ..

اغلى شخصين بحياة ابوي وتوفوا ( قتلكم ام سعد وعمي ) والشخص الثالث  ( سعد ) صديق ابوي اللى ابوي يعزة مرهـ ، ومن كثر ما ابوي يعز صديقه صرت اعز بناته ..

ماعرف وش قصة اسم ( سعد ) في حياة ابوي ،، مع العلم ان جد جدي اسمه ايضا (سعد ) ..

اليوم واهي جالسة عندنا زوجة عمي ، اطالعها واتذكر ابوي على طاولة الفطور يقولي دائما وعلى طول : ( مضيعه وش اخبار بنات عمي سعد تتصلين عليهم يا بابا اسئلي عنهم  لاتقطعينهم يا بابا دائما اسئلي عنهم وعن اخبارهم …!! )

اعترف ان مقصره كثير بحقهم ، بس الوقت اشغلني ، بنته الكبيرة اكبر مني بسنة والثانية اصغر مني بسنة ،، كانوا معاي من المرحلة الابتدائية لين الثانوي ،، ولكن تفرقنا ..

ماصرنا نشوف بعض الا في المناسبات فقط …!!

واي مناسبات اما زواج ، او عزا ..

الحياة اشغلتنا صرنا ماندري عن احد ولا في وقت نسئل عن احد ،، اذا ارسلنا مسج خير ونعمة ،، او لقيناهم عبر الماسنجر ..

صادقين والله صرنا نعرف اخبار بعض عن طريق الانترنت   ” واللى ماعنده انترنت ماندري عنه “،، وصارت حياتنا غريبة جداً جداً ..

كان دائما ابوي يقول : ان بيجي زمن وبيكون الانترنت كل شئ بحياتنا ، حتى نقدر نتسوق عن طريق الكمبيوتر ( كنت اضحك واقول وش هالتخيل اللى لين بعيد شدعوة نشتري شئ من الانترنت ، حتى التلفزيون بتشوفونة عن طريق الانترنت ) ، والله انه صادق ، كل الكلام اللى قاله صادق ..

وكان يقول قبل لا يجي الدي اس ال وقبل وقبل : ( ان بيصير بعدين الانترنت مفتوح 24 ساعه لان بيكون شئ اساسي بالحياة وتسوي كل شغلك بالكمبيوتر وماتحتج تشبك بخط التلفون  )

كان دائما يقول بيجينا زمن اللى مايعرف الكمبيوتر يعتبر جاهل ، وضروري الكل يتعلم الكمبيوتر ..

انا عن نفسي من يوم مافتحت عيوني للدنيا واحنا بالرياض وفي بيتنا كمبيوتر ، وكان نظام (الدوز ) طبعا خخخخ كان بابا اللى يعلمنا عليه ويدخل الاكواد وكل شئ  ، اتذكر كان الصباح قبل لا يروح العمل يفتح لي الكمبيوتر على الالعاب ويطلع ..

ودارة الدنيا ودار الزمن وتغيرة الحياة

وصرت انا واختي واخوي احنا اللى نعلم بابا بعض الشغلات بالكمبيوتر بعد ماكان اهو اللى يعلمنا

********

اشتقت لكــ ….!!