εìíз متى بيتغير تفكير الناس؟

للاسف كل شغلهم الشاغل وهمهم بالدنيا ( القبايل والفخذ )

وكل ماهم جالسين في مكان تسمع قبيلة فلان وماخذين قبيلة فلان

والعايلة الفلانيه اصلهم كذا وكذا وكذا وجدهم كان جاي من من كوكب المريخ ومادري وش ومادري ايش ” ولازم شوية تبهير في السواليف ” ………………….الخ

ولما تروح مكان اول مرة وتسلم .. فجاءه يسئلونك وماله داعي يسئلون

انت جاي من اي كوكب ؟؟

هذا المحور الحديث اللى دائما تسمعه مليون الف مرة، من يوم ماتنولد والناس هذي اسئلتها .. موضوع يطفشني واحس بقرف

تحس من جد شعب سعودي ،، تتاكد مليون بالمية انك جالس بالسعودية لما يسئلونك عن عائلتك ..

والمشكلة ان الظاهرة هذي انتشرت بين الحريم بطريقة بايخه ،، انا احس الرجال لما يتكلمون بالموضوع عادي ..

ماعلينا من الناس ..

جلست مع بنت بنفس عمري واتوقع انها اكبر مني بسنه او سنتين ، ماعرف عمرها بالضبط ..كان طول الحديث والحوار عن قبيلتها ،، مافي شغلة الا قبيلتها زهقتنا زهق الله لا يرويكم والمشكلة قبيلتها صحيح معروفة لكن ماتعتبر زي القبايل الباقية ، وكل مانجيب سيرة اي موضوع بايخ قالت احنا واحنا (ولازم قصب بالقوة تدخل عائلتها والسالفة مالها اي دخل ) ..

ذاك اليوم كانت قافلة معاي واحس انها ارفعتلي ضغطي مصختها حبتين ،، كل البنات ساكتين يطالعونها واهي تتكلم والمشكلة الاشياء اللى تفتخر فيها كل الناس عندهم زيها ومالها اي لزوم تفتخر لو تسكت احسن لانها بدت تطلع عيوب قبيلتها من كثر ما تتكلم ،، وكلنا اللى جالسين قبايلنا احسن منها ومحد متكلم ..

قتلها : فلانه زهقتينى ترا كلنا اللى جلسين قبايل محد جلس يتكلم زيك وكانك توك تدرين انك قبيليه ومتخرعه.

قالت : احنا غير احنا بدو ..

قتلها لية واحنا من وين جاين ؟ من كوكب اخر ؟؟ >> وكنت اشر بيدي على باقي البنات ..

يا بنت الناس فكينى من هالسيرة كانك جايه من” العصر الجاهلي ” الله يهداك ، الزمن تطور والناس كبرة عقولها الحمدلله شوفي لك سالفة ثانية ، وياليت لو تفتخرين بشئ احنا ماعندنا كلنا اللى حولك بنات قبايل وكل وحده قبيلتها تقول الزود عندها بس مانتكلم يختي ،، والانسان مش بقبيلته الانسان باخلاقة وتعاملة مع الناس بمنصبة و بتعليمة ………….الخ .. القبيلة لا راحت ولا جات ،، وش الفايده انسان يكون قبيلة بس ماعنده عقل ولا اخلاق ولا شئ ..

هي : صمت وتطالعني …

انا : اكمل حديثي ” ترا هالسواليف للناس التافه اللى ماعندهم سالفة يسولفون فيها وناس مش مكملين تعليمهم يعني نقول (جاهلين ) ، اذا بنقلب الجلسة قبايل واصلن وافخاذ ترا انا اول من بيبدا وبجلس اتكلم واقولك مين اجدادي وبعدين بقولك مين اهلي وكل وحده تجلس تفتخر وبعدين بالاخير وش بنستفيد ؟؟”

( اتمنى ان كلامي تفهمة وتبطل من هالموضوع ولكن ما اتوقع انها بتغير الموضوع لانه يمشي بدمها )

- ازهق من الناس اللى تجلس وتسولف عن هالمواضيع وتطلع الجد العاشر من وين جاي ، وشلون انتم من المكان الفلاني وايش يصير لكم فلان

لين متى والناس هذا تفكير وهذا محور حديثها وهذا اهتماماتها

ياااااااااااااااااااااا عاااااااااااااااااااااااااااااااااالم يا هوووووووووووووووووووووووو خلاص كبروا عقولكم اشغلوا نفسكم بشئ مفيد وفكونا من هالسيرة اللى تطفش اللى مايتطفش..

ماعندكم سالفة اسكتوا ترا والله احسن ( السكوت من ذهب ) والذهب هالايام مرتفع سعرة والدنيا صايرة غالية ومحد يشتري الذهب >> جالسة بمجلس عجايز الاخت خخخخخخ

من جد ياجماعه ،، لدرجة ان يوصلك مسج بالجوال يقولك // سعودية وامريكيه قابلوا وحده ،، الامريكيه اسئلتها : ( ايش اخر كتاب قريتيه ،، وش هوايتك ،، وش تسوين طوال يومك ……الخ من الاسئلة المفيده ) اما السعودية بتسئلها : ( وش قبيلتكم ؟ وش ينقال لكم ؟ من وين انتم ؟ يقرب لكم فلان الفلاني؟ )

يضيق صدري لما يوصلني هالمسج احس بالاهانه من جد وماقدر انكر هالمسج ابدا ، لانه واقعي للاسف ..!!

حتى البزران تربوا على هذا الشئ ويتكلمون بنفس الموضوع ،، وحده تسولف ان ولدها متهاوش مع صديقة بالمدرسة يقول ليه يقولي احنا من المنطقة الفلانيه مو على كيفة ؟

والله حتى البزران بالمدرسة يعرفون هالسواليف …

لا بالله كدينا خير وشفنا شباب المستقبل ..

لازم نحاول نغير من هالتفكير السطحي والموضوع التافة اللى لا يودي ولا يجيب ولا حتى يوكل (خبز ) >> اوة الدقيق منقرض خلونا نقول ماتوكل ( ملح ) > هو سعر الملح ارتفع ؟؟

والله هالمواضيع ماغير يجمد العقول ويخلي الناس ترجع للورا اكثر واكثر ..

نشوف لية الدول الثانية واصلين القمر ، لان بس يكتبون اسمهم واسم ابوهم وانتهينى ..!!

مالت على البمبر بس

او تدورن خلكم على مواضيعكم اللى لا راحت ولا جات وقولوا لية نرجع على ورى ..