εìíз جميلة الاحلام الجميلة

كل يوم وكل اتصال

نسمع ان احد يحلم بعودة والدي

اكثر الايام احلم انه رجع وانى احضنه واني سعيده بعودته ..

اليوم واتصال واحد يقولي عن حلم عن ابوي ..

وامس كان اتصال واحد يقول حلم عن ابوي …

” يمكن يكون حديث نفس ،، ويمكن يكون حلم يبشرنا بقرب عودته باذن الله ”

اليوم كان الزيارة لبابا ، وراحوا ضايع ومضيع ..

مضيع قال ان بابا يسلم عليكم ودائما يحلم فيكم ..

من كم سنة سمعت ولا متأكده من هالشئ وكنت ابحث عنه وبعدين بطلت ( ان الشخص اللى تحبة وهو يحبك دائما يكون على بالك ويصير تواصل من بينكم عن طريق الاتصال ، زي فجاءة ترفع التلفون وتحصل اتصال منه وهو على بالك )

يمكن احنا نحلم فية وهو يحلم فينا لاننا كلنا مشتاقين لبعض ..

آآآآآآآآآآهـ لو تدري يا بابا قد ايش مشتاقة لك

تسئل ان كنت اصيح على غيابك اذا ماصحت على شانك اصيح على شان مين

في اغلى منك بهالدنيا ؟

لو يدرون الناس وش كثر انا مشتاقة لك ولصوتك ولوجودك بالبيت كان محد لامني لما اصيح ..

لو يدرون بس وش مكانتك بالبيت وكيف احنا مانقدر نستغنى عن بعض كان محد قال تحملوا وصبروا ، كان صاحوا اكثر مني ..

ليتني يا يبه اقد اعبر عن اللى بقلبي ، كان ارتحت وانزاح كل اللى بقلبي …

كل يوم انتظر جيتك ..

وكل ساعه اتوقع ان هذي الساعه بتكون دخلتك ..

كل ماشفت شئ وصار شئ اقول راح اقولك لما ترجع ..

راح اجلس معاك واقول يا يبة وش صار الدنيا من بعد رحيلك

ااااااااااااه يا يبة لو تدري من يوم ماطلعت لين اليوم وش صاير … !!!

اكيد اشتقت لي كثر ما انا اشتقت لك …

كرهت ايميلي ولا عاد افتحة لاني ماعاد اشوف اسمك من بين الرسايل ، كل ما اشوف ايميل يوصلني اتذكرك لانك كنت الانسان الوحيد بالبيت اللى تشاركني بالرسايل وتضحك معاي ..

ولما اشوف شئ انت تحبه اصيح واقول وينك ؟

ليتك يا يبة تسمعني واقولك عن اخباري !!!

تأكدت كل التأكيد وكنت اعرف هالشئ ، ان الدنيا بدون يا يبة ماتسوى شئ

وان صعب تعيش وفي شخص تحبة بعيد عنك ..

ومافي احد يا يبة يقدر ياخذ مكانك …!!