εìíз سبعة ايام الا ” يوم “

انتم غريبة مانتبهتوا لشغلة في مدونتي …؟؟

انا ماكتبت لكم عن ايام العيد الاضحى 1428هـ>>> بسم لله عليها وش فيها البنت .. ( مافيني شئ بس بوست محبوس )

يعني معقولة العيد (7 أيام ) ومضيعه ماكتبت ولا ربع بوست عن أيام العيد ، بس قلت عن موقف صغيرون ، وعن قصة قالتها وحده من بنات خالتي بالعيد ..

مع العلم ان السبع ايام كانت جدا جدا راااااااااااائعه ..

وكنت مصورة شغلات كثيره على شان انزلها واكتب عن المواقف اللى صارت والسواليف والاحداث ..

بس تعرفون وش اللى حصل ..

ان من يوم السبت لين الخميس كل يوم في بيت احد من اهلي ( يوم بيت خالي يوم بيت خالتي ويوم بيتنا ……………الخ )

كنت اصحى من الصبح اذا لقيت بابا على طاولة الفطور سولفت معاه وبابا يحب لما نسولف معاه وكيف صحتنا ولازم لازم يشوفنا كل يوم لو يوم واحد مايشوفك بيقول لك ( وينك هالاسبوع كلة ؟؟ )

تخيلوا ان طول الاسبوع احنا جمعات وماشفت بابا ولا جلست معاه على اي وجبة .. غير الفطور ومو دائما …

والله العظيم مشتاقة له ..

يعني كان اخر يوم لايام العيد (الجمعه ) وبابا راحل … وكنا جالسين نتغدا ونضحك ( واول مرة ضايع مايجي على الغداء اهو وزوجته ومضيع كان يومها مريض ونايم ،، يعني بس انا وامي واختي وابوي على طاولة الغداء ) ، ورحنا الصالة وانا كنت واقفة وامثل واضحك وبابا كان جالس جمب النار لان كان مرررررة برد والساعه : 3 تقريبا ،توة مأذن العصر،، واختي ضايعه تقولي الله يخليك اسكتي ،، وماما تقول ترا ضايق صدري واحس قلبي يعورني .. محد كان يضحك الا انا واحاول الطف الجو واستهبل واحس انهم بيقتلوني :d…

تعرفون يوم الجمعه ، صار شغلات كثييييييييييييييييييره يبغالي مدونة مو بوست اكتب لكم .. و ما راح اكتب لانه يضيق الصدر ، مجرد ما اتذكر يوم الجمعه ورحيل ابوي العصر والحزن اللى صار بالبيت مجرد دقائق تحول البيت الى كآبة وخوف ورعب و…….الخ من المواقف،، تنهار دموعي ..

من الشغلات اللى صارت ان جوالي كان بيدي وجوال مضيع ، وكان الوضع مرة مرة ربكة وشئ محد يتخيلة ،، والله لا يحط احد منك محط اليوم اللى حطنا فية ومابقول الله لا يحط عزيز لكم بقول حتى الله لا يحط عدو لكم ..

كنت كاتبه مواضيع كثيرة بمفكرة الجوال عن ايام العيد ،، اللى صار ان انا واختي تداففنا على باب الممر واهي دفتني بقوة على شان بتركض قبلي مادري وش صارير مادري احد ينادي مادري احد صرخ المهم صار شئ من هالقبيل ، ومن قوة مادفتني طاح جوالي من يدي وكفخ بالجدار ورجع بالارض وكان لازم يتفرمت على شان يرجع زي ماكان قبل ..

وراحت على السواليف اللى داخله ….

تفرمت صحيح ، بس فرمتوا معاه كل البوستات

احب اهنئكم جميعا انكم افتكيتوا من المواضيع اللى كانت بتنزل ..

كل عام وجوالاتكم بخير ..